Måtte fyra opp oljefyren

Dei som trudde NHH hadde fått den siste olje må tru om att. For første gong på fleire år har høgskulen måtta ta i bruk oljefyren til oppvarming. Den tørre, kalde vinteren er ein sentral del av forklaringa.

25.02.2010 - Hallvard Lyssand

Observante Paraplyen-lesarar har merkt seg at ein oljetankbil nyleg avla NHH ein lenger lossingsvisitt.

Leiar for administrativ og teknisk driftsavdeling, Erik Lundberg stadfestar at høgskulen sin oljefyr er sett i drift.

- Vi har i fleire år unngått å nytta oljefyring til oppvarming i bygningane her oppe, og har i staden satsa på straum. Det har vi kunna gjera fordi vi har to elektrokjelar som dekkjer oppvarmingsbehova sjølv i kuldeperiodar, seier han.

Utkoplingsklausul

NHH har i fleire år blitt oppvarma med elektrokjelar, men no er av ulike årsaker oljefyren kopla inn. Denne veka kom det leveranse av fyringsolje.

Foto: Asle Haukaas

Bruken av elektrokjelane er likevel styrt av reglar om utkopling.

- I særlege tilfelle kan BKK kopla ut kjelane, og då koplar oljefyren automatisk inn, fortel Lundberg.

Å få levert straum med slik utkoplingsklausul har periodevis vore temmeleg gunstig prismessig.

Dyrare straum

Men i år har det oppstått eit "særleg tilfelle".

Tørr vinter tyder lite vatn i magasina. Dermed vert det mindre kraft tilgjengeleg og straumprisane stig.

- Vi fekk varsel om utkopling av elektrokjelane i førre veke, og fredag starta vi oljefyren, seier Lundberg.

- Reint miljømessig er vi ikkje særleg glade for å bruka olje. Det er ei av årsakene til at vi har unngått å bruka oljefyren.

- At vi har hatt gode straumprisar har også spelt inn, men når den klausulerte kraftleveransen fell bort er i augneblinken olje eit billegare alternativ, held han fram.

Den oljefyrte kjelen til NHH.

Frå 2012 vil det ikkje lenger vera høve til å inngå avtalar om kraft med utkoplingsklausul. NVE har avgjort at ordninga skal opphøyra.

Sett i heilårsperspektiv er det ikkje oppvarming som krev mest straum.

- Av eit totalforbruk på 5,6 GWh gjekk 2,2 GWh til oppvarming, seier Lundberg, og understrekar at det gjeld hovudbygningane og Paviljongen.

- Vi må også betala for oppvarminga av Merino-bygget, og der har vi ikkje noko alternativ til olje. Men olja vi nyttar der er i det minste svovelfri, sluttar han.

Desse to elkjelane har lenge sytt for oppvarminga på NHH, men er no kopla ut grunna dei rådande krafttilhøva.

Det finst fleire oppvarmingsalternativ når vinteren verkeleg sett inn. Snørydding med handkraft er definitivt eitt av dei. Onsdag var fleire snøryddarar i sving på taket av Aulaen.

Foto: Hallvard Lyssand